Қазақстанда қуаты 1 ГВт жел электр станциясының құрылысы келесі кезеңге өтеді
Жамбыл облысында қуаты 1 ГВт жел электр станциясын (ЖЭС) салу жобасы практикалық іске асырудың келесі кезеңіне өтуде.
Франция президенті Эммануэль Макронның Қазақстанға ресми сапары аясында Total компаниясымен қуаттылығы 1 ГВт жел электр станциясын салу жобасы бойынша бірлескен кәсіпорын құру туралы келісім жасалды. Жобаға қатысушылар – Total (60%), «Самұрық-Қазына» АҚ (20%) және «ҚазМұнайГаз» ҰК» АҚ (20%).
Құжатқа Мемлекет басшысы Қасым-Жомарт Тоқаев пен Франция президенті Эммануэль Макронның қатысуымен қол қойылды.
Келісім бірлескен кәсіпорынды басқару, бюджетті бекіту, күрделі шығындар, дивидендтерді бөлу және басқа да мәселелер бойынша шешімдер қабылдаудың негізгі тетіктерін ресімдейді және анықтайды.
Жамбыл облысындағы Мирный ауылында 300 МВт/600 МВт электр қуатын сақтау жүйесін пайдалана отырып, қуаты 1 ГВт жел электр станциясы салынады.
«Total – біздің негізгі серіктестеріміздің бірі. «ҚазМұнайГаз» біздің компаниялар арасындағы екіжақты ынтымақтастықты одан әрі нығайтуға бағытталған», – деді М.Мирзағалиев.
2022 жылдың қараша айында осы жобаны жүзеге асыру мақсатында «Самұрық-Қазына» АҚ, «ҚазМұнайГаз» ҰК» АҚ және Total Eren арасында жобаны жүзеге асырудың негізгі шарттары туралы келісімге қол қойылды.
Қуаты 1 ГВт жел электр станциясын салу және іске қосу көміртегі ізін азайтуға, сондай-ақ Қазақстан Республикасының 2060 жылға қарай көміртегі бейтараптығына қол жеткізу мақсатын жүзеге асыруға көмектеседі.
Жоба сондай-ақ 2022 жылғы қарашадағы тиісті Үкіметаралық келісімде көзделген энергетика, жаңартылатын энергия көздері және жасыл технологиялар саласындағы Қазақстан мен Франция арасындағы екіжақты ынтымақтастықты нығайтудағы маңызды қадам болып табылады.